अनुभव,संवेदनशीलतेने ज्ञानप्राप्त उमदे नेतृत्व किरणदादा गुजर यांचा बालगंधर्व विशेष सन्मान पुरस्काराने सन्मानीत

 

 बारामती :- विविध क्षेत्रातील अनुभवाने ज्ञानप्राप्त,संवेदनशील नेतृत्व,नटराज नाट्यकला मंडळाचे अध्यक्ष किरणदादा गुजर यांना महाराष्ट्रातील प्रतिष्ठीत बालगंधर्व रंगमंदीर या संस्थेच्या वर्धापन दिनानिमित्त ना.मुरलीधर मोहोळ,नाट्यसिने अभिनेते प्रशांत दामले यांच्या हस्ते बालगंधर्व विशेष सन्मान पुरस्काराने सन्मानीत करण्यात आले.

      किरणदादा गुजर यांचे वडील स्व.बबनराव गुजर यांची ५३ व्या पुण्यतिथी दिवशीच म्हणजे मंगळवार २४ जूनला पुरस्कार मिळाल्याने दुग्धशर्करा योग आल्याची सर्व गुजर प्रेमींची भावना आहे...नाट्य व सांस्कृतिक क्षेत्रातील ४५ वर्षांच्या प्रदीर्घ योगदानाची दखल घेतली आहे.नाट्य, सांस्कृतिक आणि सामाजिक कार्यात गेली चार दशके सातत्यपूर्ण आणि समर्पित कार्य करणाऱ्या नटराज नाट्यकला मंडळाचे अध्यक्ष किरण गुजर यांना ‘बालगंधर्व विशेष सन्मान पुरस्कार’ प्राप्त झाला आहे. पुणे बालगंधर्व परिवाराच्या वतीने दिला जाणारा हा पुरस्कार बालगंधर्व रंगमंदिराच्या ५७ व्या वर्धापन दिनानिमित्त प्रदान करण्यात आला आहे. यावेळी राज्यभरातील विविध नाट्य व सांस्कृतिक क्षेत्रातील मान्यवर, ज्येष्ठ कलाकार व कलावंत उपस्थित होती.

चार दशके अखंड नाट्य सेवा

किरणदादा गुजर यांनी सन १९७९ पासून नाट्य क्षेत्रात आपले योगदानास प्रारंभ केला. त्यांच्या नटराज नाट्य कला मंडळाने आजवर ४९ नाटकांची निर्मिती केली असून,सन १९८१ पासून सलग पारितोषिके मिळवत त्यांनी आपल्या नाट्य संस्थेची आगळी-वेगळी ओळख निर्माण केली आहे.

यशस्वी नाट्य संमेलने व उपाध्यक्षपद

 गुजर यांनी अखिल भारतीय मराठी नाट्य परिषदेचे उपाध्यक्ष म्हणूनही कार्य केले.सन१९९५ आणि २०१२ या वर्षकाळात बारामतीमध्ये दोन भव्य दिव्य नाट्य संमेलनांचे यशस्वी आयोजनही त्यांनी केले होते.

पुरस्कारांची शिदोरी त्यांच्या कार्याची दखल घेत आजवर नाट्य गौरव,कला गौरव आणि जीवन गौरव असे अनेक पुरस्कार प्राप्त झाले आहेत. याशिवाय, राज्यभरातील कलाकारांच्या अडचणी सोडवण्यासाठी त्यांनी नेहमीच पुढाकार घेतला आहे.

बारामतीत रंगणारी संस्कृतीची ज्योत

   बारामतीमध्ये गेली २० वर्षे विविध उपक्रमांतून त्यांचे कार्य अविरतपणे सुरू आहे.यामध्ये

•■ स्वस्त नाटक योजना

• ■लावणी महोत्सव

•■ ज्येष्ठ कलावंत गौरव सोहळे

• ■नाट्य व नृत्य प्रशिक्षण शिबिरे

•■ राज्यस्तरीय एकांकिका स्पर्धा

•■बारामती गणेश फेस्टिवल

यांचा समावेश होतो.

नटराज कलादालन हे नवसंस्कृतीचं केंद्र

किरणदादा गुजर यांच्या संकल्पनेतून उभारण्यात आलेल्या ‘नटराज कलादालन’ या वास्तूत दर रविवारी ‘कलाकार कट्टा’ हा उपक्रम राबवण्यात येतो.येथे चित्रप्रदर्शने, व्याख्याने,सांस्कृतिक कार्यक्रम होत असून कलाकारांसाठी विनामूल्य विश्रामगृहाची सुविधा देखील उपलब्ध आहे.

     या पुरस्काराच्या निमित्ताने किरणदादा गुजर यांच्या कार्याला एक मोठा सन्मान प्राप्त झाला असून,नाट्य व सांस्कृतिक कला क्षेत्रातील कार्यकर्त्यांसाठी हे निश्चितच प्रेरणादायी ठरणारे आहे.