सोलापूरहून मुंबई, बेंगळुरूसाठी १५ ऑक्टोबरपासून हवाईसेवा; केंद्रीय मंत्री मुरलीधर मोहोळ यांची माहिती, आजपासून बुकिंगला प्रारंभ…
पुणे : सोलापूरकरांची हवाई सेवेची दीर्घ प्रतीक्षा संपली असून, येत्या १५ ऑक्टोबरपासून सोलापूर विमानतळावरून सोलापूर-मुंबई आणि सोलापूर-बेंगळुरू या दोन मार्गांवर नियमित प्रवासी विमानसेवा सुरू होणार आहे. त्यासाठीची बुकिंग प्रक्रिया आज, २० सप्टेंबरपासून सुरू होईल.
‘नवरात्रीच्या शुभमुहूर्तावर सोलापूरला मिळणारी ही दुहेरी भेट सुलभ, वेगवान आणि आधुनिक वाहतुकीकडे टाकलेले एक मोठे पाऊल आहे,’ अशी माहिती केंद्रीय नागरी हवाई वाहतूक आणि सहकार राज्यमंत्री मुरलीधर मोहोळ यांनी दिली.
ही विमानसेवा मंगळवार, बुधवार, शुक्रवार आणि शनिवारी मिळेल. यामुळे सोलापूरकरांना राज्याची आर्थिक राजधानी मुंबई, तसेच दक्षिण भारतातील औद्योगिक केंद्र बेंगळुरूशी थेट आणि जलद हवाई संपर्क मिळणार आहे. व्यापारी, उद्योजक, विद्यार्थ्यांसह भाविकांचीही या नव्या सेवेमुळे प्रचंड सोय होणार आहे.
‘सोलापूर-मुंबई विमानसेवा सुरू करण्यासाठी मुख्यमंत्री देवेंद्र फडणवीस यांनी व्हीजीएफ मंजूर केल्याने सोलापूर-मुंबई विमानसेवेचा मार्ग मोकळा झाला. मोदी सरकारच्या माध्यमातून या विमानतळाची निर्मिती केल्यानंतर प्रत्येक विमानसेवा सुरू करण्यासाठी विविध पातळ्यांवर प्रयत्न सुरू होते, ज्याला आता यश आले आहे. मुंबई आणि बेंगळुरू या दोन सेवा सुरू होणे, हा सोलापूरच्या विकासातील महत्त्वाचा टप्पा आहे,’ असे मोहोळ यांनी सांगितले.
‘सोलापूरसारख्या ऐतिहासिक, औद्योगिक आणि सांस्कृतिकदृष्ट्या महत्त्वाच्या शहराला थेट मुंबई आणि बेंगळुरूशी जोडणे ही काळाची गरज होती. या हवाईसेवेमुळे सोलापूरकरांचा प्रवासाचा वेळ वाचणार आहेच, शिवाय या भागात गुंतवणूक, रोजगारनिर्मिती आणि पर्यटनाला चालना मिळणार आहे,’ असा दावाही त्यांनी केला.
स्टार एअरच्या सेवेचे वेळापत्रक
- सोलापूर-मुंबई
प्रस्थान : दुपारी १२.५५ - मुंबई-सोलापूर
प्रस्थान : दुपारी २.४५ - बेंगळुरू-सोलापूर
प्रस्थान : सकाळी ११.१० - सोलापूर-बेंगळुरू
प्रस्थान : दुपारी ४.१५
