पालकमंत्री म्हणून माझी मलाच लाज वाटली; पुण्यातल्या सभेत अजित पवारांचा संताप

 

हडपसर: फुरसुंगी, उरुळी देवाची भागात रस्त्यांची अवस्था खूप बिकट झाली आहे. रस्त्यात खड्डा की खड्ड्यात रस्ता कळत नाही. लोक कसे सहन करतात माहिती नाही. रस्त्यांची ही स्थिती पाहून पालकमंत्री म्हणून माझी मलाच लाज वाटली, अशा शब्दांत उपमुख्यमंत्री अजित पवार यांनी फुरसुंगी, उरुळी देवाची परिसरातील रस्त्यांची अवस्था पाहून नाराजी व्यक्त केली.

या प्रसंगी हडपसरचे आमदार व प्रभारी चेतन तुपे, नगराध्यक्षपदाचे उमेदवार संतोष सरोदे, माजी नगरसेवक गणेश ढोरे, अमोल हरपळे यांच्यासह सर्वच प्रभागांतील उमेदवार आणि पदाधिकारी उपस्थित होते.

रोड शो उरुळी देवाची फाटा येथून सुरू होऊन मंतरवाडी येथून फुरसुंगी गावठाणमार्गे भेकराईनगर बस डेपोशेजारी समाप्त झाला. या वेळी सभेत पवार यांनी येथील रस्त्यांची स्थिती व वाहतूक कोंडीवर भाष्य केले. परिसरात विकासाची गती वाढली आहे. पूर्वी पिंपरी-चिंचवड महापालिकासुद्धा नगरपालिका होती, त्यानंतर वाढत्या लोकसंख्येमुळे पिंपरी-चिंचवड महापालिका झाली. आज त्यांचा विकास मोठ्या प्रमाणात झाला आहे. याही नगर परिषदेचा विकास आपण करू, असेही ते म्हणाले.

नव्या महापालिकेची गरज

वाढती लोकसंख्या पाहता प्रशासनावर मोठा ताण वाढत आहे. त्यामुळे हडपसर, मांजरी, फुरसुंगी, उरुळी देवाची, नगर रस्ता, वाघोली, लोणी काळभोर, उरुळी कांचन, होळकरवाडी, उंड्री-पिसोळी, वडकी या सर्व गावांना सोबत घेऊन नवीन महापालिका करणे गरजेचे असल्याचेही अजित पवार म्हणाले.