माळेगाव नगरपंचायत निवडणुकीच्या सांगता सभेत अजित पवार यांची विरोधकांवर टोलेबाजी

 

माळेगाव: माळेगाव नगरपंचायत निवडणुकीच्या पार्श्वभूमीवर उपमुख्यमंत्री अजित पवार, भाजप नेते रंजन तावरे आणि युतीचे इतर पदाधिकारी यांची प्रचारसभा आज झाली. कट्टर राजकीय विरोधक असूनही पवार–तावरे युतीने एकत्र येत निवडणुकीच्या रिंगणात जोरदार उतरले आहे. त्यांच्या विरोधात शरद पवार गट तसेच काही अपक्ष उमेदवार आपली ताकद आजमावत आहेत.

माळेगाव नगरपंचायत निवडणुकीच्या सांगता सभेत अजित पवार यांनी जोरदार भाषण करत विरोधकांवर टोलेबाजी केली. ते म्हणाले, जोपर्यंत बारामतीकर माझ्या पाठीशी आहेत, तोपर्यंत मी कोणाच्या बाला घाबरत नाही. विरोध करायचा असेल तर खुलेआम करा. मी कोणापासून घाबरणाऱ्यांपैकी नाही.

पुढे बोलताना त्यांनी काही उमेदवारांवर अप्रत्यक्ष टीका केली. काहींचे फॉर्म राहिले आहेत आणि ते म्हणतात निवडून आलो तर आम्ही दादांच्या गटात जाणार. पण त्यांना आधी दादांनी घ्यायला हवे ना! ज्यांना या वेळी उमेदवारी देता आली नाही, त्यांनी राग उद्याच्या मतदानात काढू नका, असे त्यांनी स्पष्ट केले.

अजित पवार पुढे म्हणाले, मी खासदार करू शकतो, आमदार करू शकतो, दहा–बारा जणांना मंत्री करू शकतो. तसंच नगरपंचायतीतही तुम्हाला नगरसेवक करू शकतो. इतर संस्थांमध्ये जागा असतात; तिथेही तुम्हाला संधी देऊ. सभेच्या शेवटी त्यांनी युतीच्या सर्व उमेदवारांना निवडून देण्याचे आवाहन केले तसेच नगराध्यक्ष आणि नगरसेवक पदाचे उमेदवार मोठ्या मताधिक्याने विजयी करावेत, असे पवार यांनी आवर्जून सांगितले.