प्रचारामुळे पुतण्याच्या लग्नात उपमुख्यमंत्री अजित पवार गैरहजर
पवार घराण्यात आज मोठा सोहळा असूनही उपमुख्यमंत्री अजित पवार हे स्थानिक स्वराज्य संस्थांच्या निवडणुकीच्या प्रचारात दंग आहेत. त्यांनी आज पुतण्या युगेंद्र पवार यांच्या लग्नाला उपस्थित न राहता दौंडमध्ये प्रचाराला पसंती दिली आहे. यावेळी बोलताना ते म्हणाले की, आधी लगीन कोंडाण्याचं मग रायबाचं या ऐतिहासिक वाक्याचा दाखला देत माझ्याही घरात आज लग्न आहे, पण मी प्रचारात आहे, असं अजित पवार यांनी म्हटलं आहे.
तसेच त्यांनी कार्यकर्त्यांना कामाला लागण्याचे आदेश देखील दिले आहेत. दरम्यान, राजकीय वर्तुळात या दोन्ही गटातील संबंधांवर सातत्याने चर्चा होत असताना, अजित पवारांची ही गैरहजेरी लक्ष वेधणारी ठरली आहे. या सोहळ्याची सर्वात खास गोष्ट म्हणजे खासदार सुप्रिया सुळे यांचा उत्स्फूर्त सहभाग.
सुप्रिया सुळे यांनी लग्नाच्या कार्यक्रमात तुफान डान्स केला, ज्यामुळे सोहळ्याची रंगत वाढली आणि एक उत्साहाचे वातावरण निर्माण झाले. तर दुसरीकडे उपमुख्यमंत्री अजित पवार हे मात्र या कार्यक्रमाला उपस्थित नव्हते. पवार कुटुंबातील या कौटुंबिक सोहळ्याला राजकीय रंगाची किनार लाभल्याने, उपस्थितांमध्ये सुप्रिया सुळेंच्या डान्सची आणि अजित पवारांच्या गैरहजेरीची चर्चा रंगली होती.
