लाखोंची फसवणूक करणारा फरार आरोपी २ वर्षांनंतर जेरबंद

 

बारामती : बारामती शहरातील ज्येष्ठ नागरिकांना पर्यटनाचे आमिष दाखवून लाखोंची फसवणूक करणाऱ्या फरार आरोपीस दोन वर्षांच्या शोधमोहीमेनंतर अखेर बारामती शहर पोलिसांनी शिताफीने ठोकल्या बेड्या.

सन 2023 मध्ये “सिक्कीम–दार्जिलिंग टूर आयोजित करतो” असे सांगून ज्येष्ठ नागरिकांकडून एकूण २,१०,००० रुपये घेऊन त्यांची फसवणूक करण्यात आली होती. या प्रकरणी बारामती शहर पोलिस ठाण्यात गुन्हा दाखल करण्यात आला होता. या गुन्ह्यातील मुख्य आरोपी आदम मेहबूब सय्यद ( रा. पवारवाडी, ता. फलटण, ) हा गुन्हा दाखल झाल्यापासून सतत ठिकाणे बदलत होता. पोलिसांना दिशाभूल करत तो तब्बल दोन वर्षे फरार राहिला. मात्र बारामती शहर पोलिसांच्या पथकातील पोलीस हवालदार रामचंद्र शिंदे, पोलीस हवालदार सुलतान डांगे, पोलीस शिपाई पोपट कवीतके, पोलीस शिपाई गिरीष नेवसे यांनी अथक मेहनत, तांत्रिक विश्लेषण, गोपनीय माहिती आणि सातत्यपूर्ण पाठपुराव्याद्वारे आरोपीच्या हालचालींचा मागोवा घेतला.

1 डिसेंबर रोजी आरोपी आपल्या पवारवाडी येथील राहत्या घरी येणार असल्याची खात्रीशीर माहिती मिळाल्यानंतर पथकाने शिताफीने सापळा रचला आणि आरोपीला त्याच्या घराजवळून जेरबंद करण्यात आले. सदर गुन्हा महिला पोलीस उपनिरीक्षक संध्याराणी देशमुख यांच्या मार्गदर्शनाखाली तपासला जात आहे. आरोपीने इतर नागरिकांचीही फसवणूक केली आहे का ? याचा तपास सुरू असून आणखी पीडित समोर येण्याची शक्यता वर्तवली जात आहे.

या कामगिरीसाठी पोलीस अधीक्षक संदीपसिंग गिल, अप्पर पोलीस अधीक्षकरमेश चोपडे, अप्पर पोलीस अधीक्षक गणेश बिरादार, उपविभागीय पोलीस अधिकारी बारामती सुदर्शन राठोड, पोलीस निरीक्षक बारामती शहर श्रीशैल चिवडशेट्टी यांच्या मार्गदर्शनाखाली तपास करण्यात आला.

नागरिकांसाठी पोलिसांचे आवाहन

पर्यटन, गुंतवणूक, लॉटरी किंवा इतर कोणत्याही आर्थिक आमिषांवर विश्वास ठेवण्यापूर्वी पडताळणी करावी. संशयास्पद परिस्थिती दिसल्यास त्वरित पोलीस स्टेशनला कळवावे, असे आवाहन बारामती शहर पोलीस स्टेशनचे प्रभारी पोलीस निरीक्षक श्रीशैल चिवडशेट्टी यांनी केले आहे.