सरकारी कर्मचाऱ्यांची चांदी! ८ व्या वेतन आयोगापूर्वी 'डीए' गणनेत मोठ्या बदलाची शक्यता; पगार कितीने वाढणार?

 

नवी दिल्ली : ८ व्या वेतन आयोगाच्या अंमलबजावणीपूर्वी महागाई भत्त्याच्या गणनेचे सूत्र बदलण्याची मागणी आता जोर धरू लागली आहे. वाढता कौटुंबिक विस्तार आणि आधुनिक गरजा लक्षात घेऊन या सूत्रात बदल करण्याची मागणी कर्मचारी संघटनांनी केली आहे. जर सरकारने हा बदल स्वीकारला, तर सरकारी कर्मचाऱ्यांच्या वेतनात आणि पेन्शनमध्ये मोठी वाढ होण्याची शक्यता आहे.

महागाई भत्त्याच्या सध्याच्या गणनेवर 'ऑल इंडिया ट्रेड युनियन काँग्रेस' सह अनेक संघटनांनी आक्षेप घेतला आहे. सध्याची व्यवस्था वाढत्या जीवनमानाचा खर्च अचूकपणे दर्शवत नसल्याचे त्यांचे म्हणणे आहे. त्यामुळे वेतन आणि निवृत्ती वेतन निश्चित करण्याच्या पद्धतीचा फेरविचार करण्याची मागणी केली जात आहे.

विशेष म्हणजे, ८ व्या वेतन आयोगाने आपल्या १८ प्रश्नांच्या प्रश्नावलीवर सूचना देण्यासाठीची अंतिम मुदत ३१ मार्च २०२६ पर्यंत वाढवली आहे. याच पार्श्वभूमीवर 'डीए'च्या सूत्राचा मुद्दा ऐरणीवर आला आहे.

कर्मचारी संघटनांच्या प्रमुख मागण्या काय आहेत?

सध्याच्या महागाई भत्त्याच्या सूत्रात अनेक त्रुटी असल्याचे सांगत संघटनांनी काही मुद्दे उपस्थित केले आहेत.

कुटुंब घटकात वाढ : सध्याच्या सूत्रात ३ सदस्यांचे कुटुंब आधारभूत मानले जाते. मात्र, आता अवलंबून असणारे वृद्ध माता-पिता आणि मुलांचा खर्च पाहता, हे प्रमाण ५ सदस्य इतके करावे, अशी मागणी होत आहे.

आधुनिक खर्चाचा समावेश : इंटरनेट, डिजिटल सेवा, प्रगत आरोग्य सुविधा आणि उच्च शिक्षणाचा खर्च सध्याच्या सूत्रात पुरेशा प्रमाणात विचारात घेतलेला नाही. हे खर्च आता चैनीचे नसून मूलभूत गरजा बनले आहेत.

इतर मागण्या : महागाई भत्ता मूळ वेतनात विलीन करणे, फिटमेंट फॅक्टरमध्ये वाढ, जुनी पेन्शन योजना  लागू करणे आणि सामाजिक सुरक्षा सुविधांमध्ये सुधारणा करणे.