बारामती विधानसभेच्या पोटनिवडणुकीत लक्ष्मण हाके यांचा सुनेत्रा पवारांना पाठिंबा
बारामतीत संपतराव टाकले यांच्या निवासस्थानी नामदार भरणे व हाके यांच्या चर्चा झाली. यावेळी पवार यांचे निकटवर्तीय किरण गुजर हे देखील बैठकीला उपस्थित होते. दिवंगत उपमुख्यमंत्री अजित पवार यांनी बारामतीचा केलेला सर्वांगीण विकास, राज्याच्या विकासात त्यांचे असणारे योगदान लक्षात घेऊन हाके यांनी उपमुख्यमंत्री सुनेत्रा पवार यांना पाठिंबा द्यावा, अशी विनंती भरणे यांनी केली.
बंद दाराआड त्यांची काही वेळ चर्चा झाली. हाके यांनी ती मान्य करत संयुक्त पत्रकार परिषद घेत पवार यांना पाठिंबा देत असल्याचे जाहीर केले. दरम्यान गेल्या महिनाभरापासून हाके यांनी बारामतीची निवडणूक कोणत्याही परिस्थितीत लढवणार असे सांगत रान उठवले होते. त्यामुळे ही निवडणूक बिनविरोध होणार नाही हे जवळपास निश्चित झाले होते. परंतु सोमवारी सकाळी घडलेल्या वेगवान घडामोडीनंतर हाके यांनी माघार घेतली. हाके यांनी केलेल्या सहकार्याबद्दल भरणे यांनी त्यांचे आभार व्यक्त केले.
