दुधाच्या दरात वाढ!! नव्या किमती आजपासून लागू
देशावर सध्या इंधन संकट असून पेट्रोल, डिझेल आणि गॅसच्या किमती वाढण्याचे संकेत मिळत आहेत. मात्र याच दरम्यान आता सर्वसामान्य माणसासाठी आवश्यक असणाऱ्या दुधाच्या किमतीत सुद्धा मोठी वाढ झाली आहे. दूध क्षेत्रातील आघाडीच्या कंपन्या असलेल्या अमूल आणि मदर डेअरीने, त्यांच्या पॅकेज्ड दुधाच्या दरात एकापाठोपाठ एक दरवाढ जाहीर केली आहे. हि नवीन दरवाढ आजपासून म्हणजेच १४ मे पासून लागू होणार आहे. त्यामुळे सर्वसामान्य ग्राहकांच्या खिशाला मोठी झळ बसणार आहे.
अमूल दुधाच्या दरात प्रति लिटर २ रुपयांची वाढ झाली आहे, तर मदर डेअरीच्या पॅकेज्ड दुधाच्या दरातही प्रति लिटर २ रुपयांची वाढ झाली आहे. कंपन्यांनी या दरवाढीमागे वाढता खर्च हे कारण दिले आहे. यापूर्वी अमूलने शेवटची दुधाची दरवाढ गेल्या वर्षी १ मे २०२५ रोजी जाहीर केली होती. आता, १४ मे पासून त्यांच्या दुधाच्या दरात पुन्हा वाढ झाली आहे.
दिल्ली-एनसीआरमधील दुधाच्या नवीन दरांनुसार, कंपनीच्या म्हणण्यानुसार, अमूल म्हशीचे दूध आता ७३ रुपये प्रति लिटरऐवजी ७५ रुपये प्रति लिटर दराने उपलब्ध होईल. अमूल गोल्डची किंमत आता ६७ रुपये प्रति लिटरऐवजी ६९ रुपये प्रति लिटर झाली आहे, तर अमूल ताझा दुधाची किंमत आता ५५ रुपये प्रति लिटरऐवजी ५७ रुपये प्रति लिटर झाली आहे.
फक्त अमूलच नाही, तर दुधाच्या दरवाढीनंतर लगेचच मदर डेअरीनेही आपल्या दुधाच्या दरात वाढ जाहीर केली. मदर डेअरीनेही देशभरात दुधाच्या दरात प्रति लिटर २ रुपयांनी वाढ केली आहे. वाढत्या उत्पादन खर्चाची भरपाई करण्यासाठी ही दरवाढ करण्यात आली आहे. ताज्या दरवाढीनंतर, मदर डेअरीच्या फुल क्रीम दुधाची (पॅकेट केलेले) किंमत आता ७२ रुपये प्रति लिटर झाली आहे, पॅकेज केलेल्या टोन्ड दुधाची किंमत ५८ रुपये प्रति लिटरवरून ६० रुपये करण्यात आली आहे, तर डबल टोन्ड दुधाची किंमत ५४ रुपये प्रति लिटर असेल.
गाईच्या दुधाची किंमत ६० रुपये प्रति लिटरवरून ६२ रुपये प्रति लिटर करण्यात आली आहे. देशातील दोन्ही दूध पुरवठादारांनी दुधाच्या दरवाढीमागे वाढता खर्च हे कारण सांगितले आहे. अमूलने म्हटले आहे की, जनावरांच्या खाद्याचा आणि पॅकेजिंगचा खर्च वाढल्यामुळे दुधाची किंमत वाढवण्यात आली आहे. मदर डेअरीनेही ही दरवाढ खर्चातील वाढीचाच एक भाग असल्याचं म्हंटल आहे. या दोन्ही आघाडीच्या कंपन्यांनी दुधाच्या किमतीत वाढ केल्याने सर्वसामान्य माणसाच्या खिशाला आता आणखी झळ बसणार आहे.
