माळेगाव साखर कारखान्याच्या व्हाईस चेअरमनपदी नितीन शेंडे; एकमताने निवड
बारामती: माळेगाव सहकारी साखर कारखाना लिमिटेड, माळेगावच्या व्हाईस चेअरमनपदी नितीन वामनराव शेंडे यांची एकमताने निवड करण्यात आली. कारखान्याच्या चेअरमन सुनेत्रा अजित पवार यांच्या निर्देशानुसार संचालक मंडळाच्या बैठकीत हा निर्णय घेण्यात आला.
कारखान्याच्या संचालक मंडळाची बैठक नुकतीच पार पडली. या बैठकीत व्हाईस चेअरमन पदासाठी नितीन वामनराव शेंडे यांच्या नावाचा प्रस्ताव मांडण्यात आला. संचालक मंडळातील सदस्यांनी या प्रस्तावाला एकमताने मंजुरी दिल्याने शेंडे यांची व्हाईस चेअरमनपदी निवड निश्चित झाली. माळेगाव सहकारी साखर कारखान्याच्या कामकाजात शेतकरी, सभासद आणि कामगारांच्या हिताला प्राधान्य देत कारखान्याची प्रगती साधण्याच्या दृष्टीने संचालक मंडळाकडून विविध निर्णय घेतले जात आहेत. त्याच पार्श्वभूमीवर शेंडे यांच्यावर व्हाईस चेअरमनपदाची जबाबदारी सोपविण्यात आली आहे.
सुनेत्रा अजित पवार यांच्या नेतृत्वाखाली कारखान्याच्या कामकाजाला अधिक गतिमान करण्याबरोबरच सभासद व ऊस उत्पादक शेतकऱ्यांच्या प्रश्नांना प्राधान्य देण्याचा प्रयत्न केला जात आहे. नव्या जबाबदारीमुळे कारखान्याच्या प्रशासनात शेंडे यांचा अनुभव आणि सहभाग अधिक महत्त्वाचा ठरणार आहे.
एकमताने निवड; समर्थकांकडून अभिनंदन
व्हाईस चेअरमनपदासाठी नितीन शेंडे यांची निवड झाल्यानंतर संचालक मंडळातील सदस्य, कारखान्याचे अधिकारी, कर्मचारी तसेच समर्थकांनी त्यांचे अभिनंदन केले. कारखान्याच्या आगामी वाटचालीत शेंडे यांच्या नेतृत्वाचा सकारात्मक उपयोग होईल, असा विश्वास यावेळी व्यक्त करण्यात आला.
