मनोज जरांगेंना वाढता पाठिंबा; 'चलो मुंबई' म्हणत आमदार-खासदारांचीही रांग लागली; कोणत्या नेत्यांकडून फुल्ल सपोर्ट?
मराठवाड्यातील बहुतांश जिल्ह्यात कार्यकर्ते आणि सामान्य जनतेचा लोकप्रतिनिधींवर मराठा आरक्षणाला पाठिंबा देण्यासाठी प्रचंड दबाव होता. यामुळेच आता जरांगे पाटील यांच्या आंदोलनाला पाठिंबा देण्यासाठी आमदार-खासदारांची रांग लागल्याचं दिसत आहे.
मनोज
जरांगे पाटील हे आज मराठा समाजाला ओबीसीतून आरक्षण मिळावं, या मागणीसाठी
मुंबईकडे निघाले आहेत. गावगाड्यातील मराठा समाजातील तरुण जरांगे पाटलांच्या
या आंदोलनात सहभागी होत मुंबईकडे मार्गक्रमण करत आहेत. अशातच
मराठवाड्यातील अनेक लोकप्रतिनिधींनीही जरांगे पाटलांच्या या आंदोलनाला
जाहीर पाठिंबा दिला आहे.
जरांगे पाटलांनी काय आवाहन केलं होतं?
मनोज
जरांगे पाटील यांनी मुंबईकडे निघण्याच्या दोन-तीन दिवस आधी बीडमध्ये एक
इशारा बैठक घेतली होती. यावेळी बोलताना त्यांनी समाजाला आवाहन केलं होतं
की, तुमचे आमदार, खासदार, जिल्हा परिषद सदस्य, पंचायत समिती सदस्य, सरपंच,
ग्रामपंचायत सदस्य यातील कोणालाही घरी बसून देवू नका.
कोणकोणत्या लोकप्रतिनिधींकडून जरांगेंना जाहीर पाठिंबा?
1.
विजयसिंह पंडित- राष्ट्रवादी काँग्रेस, आमदार, गेवराई - बीड जिल्ह्यातील
गेवराई मतदारसंघातील राष्ट्रवादीचे आमदार विजयसिंह पंडित यांनी
आठवडाभरापूर्वीच आपल्या सोशल मीडिया पोस्टमधून चलो मुंबईचा नारा दिला होता.
तसंच मतदारसंघात अनेक ठिकाणी आंदोलनाला पाठिंबा देत मतदारसंघातील
नागरिकांना मुंबईला निघण्याचं आवाहन करणारे भलेमोठे पोस्टर्स लावले होते.
2. प्रकाश सोळंके- राष्ट्रवादी काँग्रेस, आमदार, माजलगाव
माजलगाव मतदारसंघाचे राष्ट्रवादीचे आमदार प्रकाश सोळंके यांनी
सुरुवातीपासूनच मराठा आरक्षण आंदोलनाला जाहीर पाठिंबा देण्याची भूमिका
घेतली होती. आता जरांगे पाटील यांनी मुंबई आंदोलनाची घोषणा केल्यानंतरही मी
या आंदोलनात सहभागी होणार असल्याचं सोळंके यांनी जाहीरपणे सांगितलं.
3. संदीप क्षीरसागर- राष्ट्रवादी काँग्रेस शरदचंद्र पवार आमदार, बीड विधानसभा
बीड हा मराठाबहुल विधानसभा मतदारसंघ असल्याने या मतदारसंघाचे आमदार संदीप
क्षीरसागर यांच्यावरही आंदोलनात सहभागी होण्यासाठी लोकांचा मोठ्या प्रमाणात
रेटा होता. आमदार क्षीरसागर यांनीही अगदी सुरुवातीपासून जरांगे पाटील
यांचे समर्थन केले असून काही दिवसांपूर्वीच त्यांनीही चलो मुंबईचा नारा
दिला.
4. बजरंग सोनवणे- राष्ट्रवादी काँग्रेस शरदचंद्र पवार खासदार, बीड लोकसभा
खासदार
बजरंग सोनवणे हे मी मनोज जरांगे यांच्यामुळेच खासदार झाल्याचे जाहीरपणे
सांगत असतात. जरांगे यांनी आरक्षणासाठी पुन्हा एल्गार पुकारल्यानंतर बजरंग
सोनवणे धडाडीने या आंदोलनात सामील झाले आहेत.
5. संजय ऊर्फ बंडू जाधव- शिवसेना उद्धव बाळासाहेब ठाकरे, खासदार, परभणी लोकसभा
खासदार संजय जाधव यांनी फेसबुकवर एक व्हिडिओ शेअर करत मराठा आरक्षणावरून
सरकारविरोधात हल्लाबोल करत मराठा आंदोलनात सहभागी होणार असल्याचं सांगितलं
आहे.
6. कैलास पाटील- शिवसेना उद्धव बाळासाहेब ठाकरे, आमदार, धाराशिव-कळंब विधानसभा
आमदार
कैलास पाटील यांनी फेसबुकवर पोस्ट शेअर करत मतदारसंघातील जनतेला मनोज
जरांगे पाटील यांच्या आंदोलनात सहभागी होण्याचं आवाहन केलं आहे.
7. ओम राजेनिंबाळकर- शिवसेना उद्धव बाळासाहेब ठाकरे, खासदार, धाराशिव लोकसभा
खासदार
ओम राजेनिंबाळकर यांनी फेसबुकवर पोस्ट करत सरकारने लवकरात लवकर मराठा
आरक्षणावर तोडगा काढावा, अशी मागणी करत जरांगे पाटील यांच्या आंदोलनात
पाठिंबा दर्शवला आहे.
