मनोज जरांगे लिफ्टने वरच्या मजल्यावर जात होते; थेट जमिनीवर आदळली लिफ्ट

 

बीड:- मराठा आरक्षणासाठी आंदोलन करणारे मनोज जरांगे पाटील हे लिफ्टमधून वरती जात असताना अपघात घडला. पहिल्या मजल्यावरून लिफ्ट थेट खाली कोसळल्याची घटना घडली. सुदैवाने या अपघातात कुणालाही मोठी दुखापत झाली नाही. मनोज जरांगे यांच्यासह आत अडकलेल्या सर्वांना सुखरुप बाहेर काढण्यात आलं.

बीडमध्ये एका रुग्णालयात मनोज जरांगे पाटील गेले होते. एका रुग्णाला भेटायला जाण्यासाठी लिफ्टमध्ये प्रवेश केला. रुग्ण ज्या मजल्यावर आहे त्या ठिकाणी जाण्यासाठी लिफ्ट वरती निघाली पण वर जाणाऱ्या लिफ्टमध्ये बिघाड झाला. त्यानंतर थेट खालच्या मजल्यावर लिफ्ट आदळली. शिवाजीराव क्रिटीकल केअर रुग्णालयात घडलेल्या या घटनेनं खळबळ उडाली.

बीडमधील हत्या प्रकरण, मारहाण प्रकरणांवरून मनोज जरांगे पाटील हे आता सरकारसह प्रशासनावर टीका करत आहेत. महादेव मुंडे हत्या प्रकरणी दीड वर्षापेक्षा अधिक काळ झालं तरी आरोपींनी अटक करण्यात आली नाहीय. त्यानिमित्त बीड शहरात आले असताना मनोज जरांगे पाटील गाठीभेटीसाठी रुग्णालयात गेले होते. त्यावेळी पहिल्या मजल्यावरून लिफ्ट थेट जमिनीवर आदळली. या घटनेतून जरांगे पाटील थोडक्यात बचावले आहेत.

लिफ्ट बिघडल्यानंतर त्यात मनोज जरांगे पाटील यांच्यासह काही जण आहेत हे समजताच मोठी खळबळ उडाली होती. लिफ्ट जोरात खालच्या मजल्यावर आदळली. त्यानंतर जरांगे पाटील यांच्यासह सहकारी लिफ्टचे दरवाजे तोडून बाहेर पडल्यानंतर सर्वांचा जीव भांड्यात पडला.