बारामतीचा पीएमआरडीएमध्ये समावेश होणार यावर जवळपास शिक्कामोर्तब; आणखी वेगाने होणार विकास

 

बारामती:- पुणे महानगर प्रदेश विकास प्राधिकारणांतर्गत बारामती तालुक्याचा समावेश करण्याच्या हालचाली सुरू झाल्या आहेत. उपमुख्यमंत्री अजित पवार यांनी याबाबत पुढाकार घेतला असून त्यासंदर्भात अहवालही शासनाकडून मागवण्यात आला आहे. त्यामुळे येणाऱ्या काळात बारामतीचा पीएमआरडीएमध्ये समावेश होणार यावर जवळपास शिक्कामोर्तब झाले असून त्या माध्यमातून बारामतीच्या विकासाला गती मिळणार आहे.

पीएमआरडीएकडे हजारो कोटींच्या ठेवी आहेत. त्यामुळे विकासकामांसाठी पीएमआरडीएला शासनाच्या निधीवर अवलंबून राहावे लागत नाही. कार्यक्षेत्रातील विकासकामासाठी तात्काळ निधी उपलब्ध करून दिला जातो. त्यामुळे पीएमआरडीएमध्ये समावेश होणं ही बारामतीच्या दृष्टीने फायदेशीर बाब ठरणार आहे. पीएमआरडीएमध्ये समावेश झाल्यास येथील रस्त्यांचे जाळे, नागरीकरणाचे व्यवस्थापन यामध्ये मोठ्या प्रमाणात बदल होणार असून त्या माध्यमातून पीएमआरडीएच्या उत्पन्नातही वाढ होणार आहे.

बारामतीचा समावेश पीएमआरडीएमध्ये करावा यासाठी उपमुख्यमंत्री अजित पवार यांनी पुढाकार घेत मुख्यमंत्री देवेंद्र फडणवीस यांच्याकडे मागणी केल्याचे सांगण्यात येत आहे. त्यानुसार याबाबत पीएमआरडीएला सूचना देण्यात आल्या असून त्याबाबतचा अहवालही शासनाकडून मागवण्यात आला आहे. याबाबत शासन पातळीवर निर्णय झाल्यानंतर बारामतीच्या पीएमआरडीएतील समवेशावर शिक्कामोर्तब होणार आहे.