पंतप्रधान मंत्री नरेंद्र यांची ३० सप्टेंबर रोजी पाटस येथे सभा; कार्यक्रम स्थळाची प्रशासकीय अधिकाऱ्यांकडून पाहणी
देशाचे पंतप्रधान मंत्री नरेंद्र मोदी हे पंचायत समिती राज तसेच विविध शासकीय विकासकामांच्या महत्त्वपूर्ण कार्यक्रमांसाठी महाराष्ट्रात येणार आहेत. पुणे जिल्ह्यातील आणि दौंड तालुक्यातील पाटस येथे त्यांच्या सभेचे आयोजन करण्यात आले आहे.या पार्श्वभूमीवर पाटस येथे निवड करण्यात आलेल्या कार्यक्रम स्थळाची प्रशासकीय अधिकाऱ्यांनी नुकतीच पाहणी केली आहे.
या पाहणी दरम्यान आमदार राहुल कुल, पुण्याचे विभागीय आयुक्त चंद्रकांत फुलकुंडवार, कोल्हापूर परिक्षेत्राचे पोलिस महानिरीक्षक सुनील फुलारी, पुणे जिल्हाधिकारी जितेंद्र डुड्डी, ग्रामीण पोलीस अधीक्षक संदीप सिंह गिल, पुणे जिल्हा परिषदेचे मुख्य कार्यकारी अधिकारी गजानन पाटील, अपर पोलीस अधीक्षक बारामती गणेश बिरादार,
दौंड उपविभागीय पोलिस अधिकारी बापूराव दडस, पोलिस निरीक्षक नारायण देशमुख, गोपाळ पवार, प्रांताधिकारी रेवणनाथ लबडे, तहसीलदार अरुण शेलार, दौंड पंचायत समितीचे गटविकास अधिकारी अरुण मळभर तसेच विविध संबंधित विभागांचे अधिकारी यावेळी उपस्थित होते. या पाहणीत सुरक्षा व्यवस्था, वाहतूक नियोजन, कार्यक्रम स्थळाची आखणी तसेच नागरिकांच्या सोयी-सुविधांचा सखोल आढावा घेण्यात आला.
