बारामतीत उद्या अजितदादांच्या उपस्थितीत प्रचाराची सांगता सभा
बारामती: बारामती नगरपरिषद निवडणूकीसाठी मंगळवार दि. २ डिसेंबर रोजी मतदान होणार आहे. या पार्श्वभूमीवर उद्या रविवार दि. ३० नोव्हेंबर रोजी उपमुख्यमंत्री अजित पवार यांच्या उपस्थितीत सांगता सभा पार पडणार आहे. शहरातील शारदा प्रांगणात ही सभा होणार आहे.
बारामती नगरपरिषदेच्या निवडणुकीत राष्ट्रवादीकडून नगराध्यक्षपदासह ४२ उमेदवार रिंगणात होते. त्यापैकी आठ उमेदवार बिनविरोध निवडून आले आहेत. उर्वरीत ३४ जागांसाठी ही निवडणूक होत आहे. त्यापैकी प्रभाग क्र. १३ ब आणि १७ अ या दोन जागांवरील निवडणूक पुढे ढकलण्यात आली आहे. त्यामुळे दि. २ डिसेंबर रोजी ३२ जागांसाठीच मतदान प्रक्रिया पार पडणार आहे. त्यामध्ये राष्ट्रवादीसह भाजप, राष्ट्रवादी शरद पवार गट आणि अपक्ष उमेदवार नशीब आजमावत आहेत.
बारामती नगरपरिषदेवर उपमुख्यमंत्री अजित पवार यांची एकहाती सत्ता राहिली आहे. विशेष म्हणजे या निवडणुकीत त्यांनी विरोधकांनाही आपल्यासोबत घेतले आहे. त्यामुळं या निवडणुकीत राष्ट्रवादीचं पारडं जड असल्याचं सांगितलं जात आहे. मात्र काही प्रभागात अपक्षांनी एन्ट्री केल्यामुळे निवडणूक चुरशीची होईल असं चित्र आहे. त्यामुळं उद्या होत असलेल्या सांगता सभेत अजितदादा काय बोलतात याकडे लक्ष लागलं आहे.
बारामती नगरपरिषदेसमोरील शारदा प्रांगणामध्ये उद्या संध्याकाळी ६.३० वाजता ही सभा होणार आहे. या सभेची जय्यत तयारी करण्यात आली असून या सभेला नागरिकांनी मोठ्या संख्येनं उपस्थित राहण्याचं आवाहन राष्ट्रवादी कॉँग्रेस पक्षाकडून करण्यात आले आहे.
