राज्याच्या मुख्य सचिवपदी राजेश अग्रवाल
अनेक वर्षे केंद्र सरकारमध्ये प्रतिनियुक्तीवर असलेले अग्रवाल हे गेल्या महिन्यात राज्याच्या सेवेत परतले तेव्हाच त्यांची मुख्य सचिवपदी नियुक्ती होणार हे स्पष्ट झाले होते. राजेश अग्रवाल हे भारतीय प्रशासकीय सेवेतील महाराष्ट्र कॅडरचे १९८९ चे अधिकारी असून त्यांचे मूळ गाव पंजाबमधील जालंधर हे आहे.
त्यांनी नवी दिल्लीतील भारतीय तंत्रज्ञान संस्थेतून (आयआयटी) कॉम्प्युटर सिस्टिम विषयामध्ये बीटेक केले आहे. अग्रवाल यांनी सेवाकाळात सहायक जिल्हाधिकारी रत्नागिरी, जिल्हा परिषद जळगाव येथे मुख्य कार्यकारी अधिकारी, अकोला जिल्हाधिकारी, कृषी आणि मत्स्यव्यवसाय, सामाजिक न्याय, वित्त, माहिती तंत्रज्ञान विभागाचे सचिव म्हणून काम केले आहे.
महाराष्ट्र सदन नवी दिल्ली येथे उप विशेष आयुक्त, केंद्रीय ग्रामविकास राज्यमंत्री यांचे खाजगी सचिव तसेच केंद्र सरकारमध्ये भारत निवडणूक आयुक्त कार्यालयात संचालक, इंटर्नल एक्स्चेंज ऑफ इंडिया नवी दिल्ली येथे राष्ट्रीय अतिरिक्त मुख्य कार्यकारी अधिकारी, केंद्र सरकारच्या वित्त सेवा विभागात सह सचिव, आदिवासी विकास विभागात सह सचिव, कौशल्य विकास विभागाचे महासंचालक (प्रशिक्षण), पेट्रोलियम आणि नॅचरल गॅस विभागात अतिरिक्त सचिव आणि वित्त सल्लागार, कौशल्य विकास विभागात सचिव, सामाजिक न्याय विभागाचे सचिव आदी पदांवर काम केले आहे.
अग्रवाल यांना मुख्य सचिवपदावर एक वर्षाचा कालावधी मिळणार आहे. ते पुढील नोव्हेंबर अखेर निवृत्त होतील. अग्रवाल हे केंद्रातून राज्याच्या सेवेत आल्याने इक्बालसिंग चहल, भूषण गगराणी, दीपक कपूर आदी येत्या वर्षभरात निवृत्त होणाऱ्या अधिकाऱ्यांची मुख्य सचिवपदाची संधी गेली आहे.
