बारामतीकरांच्या मानसन्मानाने जबाबदारी वाढली - नगराध्यक्ष सचिन सातव
बारामती स्पोर्ट्स फाउंडेशनच्या वतीने नवनिर्वाचित नगराध्यक्ष सचिन सातव आणि सर्व नवनिर्वाचित नगरसेवकांना सन्मानित करण्यात आले.
ज्येष्ठ नेते शरद पवार यांनी १९६७ सालापासून बारामतीत ८० टक्के समाजकारण आणि २० टक्के राजकारणाचे सूत्र ठेवत शहराचा पाया रचत काम केले. त्यानंतर त्यांनी उपमुख्यमंत्री अजित पवार यांच्याकडे बारामतीची धुरा सोपवली. त्यानंतर उपमुख्यमंत्री अजित पवार यांनी कधीही मागे वळून पाहिले नाही, अशा शब्दात नवनिर्वाचित नगराध्यक्ष सचिन सातव यांनी अजित पवार यांचे कौतुक केले. बारामती नगरपरिषद निवडणुकीत बारामतीकरांनी भरघोस मतांनी निवडून दिले. त्या बारामतीकर मतदार जनतेच्या अपेक्षा आम्हाला पूर्ण करावयाच्या आहेत. याच आठवड्यात बारामती नगरपरिषदेचा उपनगराध्यक्षपदासह स्वीकृत नगरसेवकांच्या निवडी पार पडतील. त्यामुळे याच आठवड्यापासून आम्हा सर्वांना कामाला लागायचे आहे. केलेल्या सत्काराच्या माध्यमातून जनता डोक्यावर घेत कामाची पोहोचपावती देते. आपल्याला चांगले काम करून नागरिकांच्या अपेक्षांना न्याय द्यायचा आहे. समाजातील सर्व स्तरातील लोकांना घेऊन बारामती शहर घडविण्याचा मानस सातव यांनी व्यक्त केला. त्यासाठी बारामतीकरांनी साथ द्यावी, असे आवाहन त्यांनी केले.
