"आमच्याकडे आता तीन 'संजय' आहेत! चौथा... "; ६ खासदारांच्या प्रवेशानंतर एकनाथ शिंदेंची प्रतिक्रिया; ठाकरेंना लगावला टोला

 

मुंबई: महाराष्ट्राच्या राजकारणात सुरू असलेल्या 'ऑपरेशन टायगर'चा दुसरा आणि सर्वात मोठा टप्पा आज अधिकृतपणे पूर्ण झाला आहे. उद्धव ठाकरे यांच्या शिवसेना (यूबीटी) गटाच्या ६ खासदारांनी आज उप मुख्यमंत्री एकनाथ शिंदे यांच्या उपस्थितीत जाहीर प्रवेश केला. या महास्फोटानंतर पत्रकारांशी बोलताना एकनाथ शिंदे अत्यंत आक्रमक आणि उत्साही मूडमध्ये दिसले. "चार वर्षांपूर्वी जेव्हा आम्ही उठाव केला, तेव्हा ४० आमदार सोबत होते. आज आम्ही चौकार नाही, तर थेट षटकार मारला आहे. हे एक नाही, तर आमचे ६ 'टायगर' आहेत," अशा शब्दांत शिंदेंनी ठाकरे गटावर जोरदार प्रहार केला.

"आमच्याकडे आता तीन 'संजय' आहेत!" – राऊतांना टोला

या पत्रकार परिषदेत बोलताना एकनाथ शिंदेंनी ठाकरे गटाचे खासदार संजय राऊत यांचे नाव न घेता त्यांच्यावर तिखट टिप्पणी केली. नवनिर्वाचित खासदार संजय दिना पाटील यांचा उल्लेख करत शिंदे म्हणाले, "सगळ्यात लाडका संजय... दिना पाटील आता आपल्यासोबत आहेत. त्यामुळे आमच्याकडे आता तीन 'संजय' झाले आहेत. ते (राऊत) तिकडेच आहेत, कोणाला घ्यायचंय का अजून? आमच्याकडे तर चौथाही संजय (संजय राठोड) आहे. मी नक्की कोणाबद्दल बोलतोय, हे तुम्हाला चांगलंच माहिती आहे," असा खोचक टोला त्यांनी लगावला.

"हा 'रिअल स्टार्स'चा बाळासाहेबांच्या विचारांचा लढा"

ठाकरे गटाकडून होणाऱ्या 'गद्दार' आणि 'रीलस्टार' या आरोपांना चोख उत्तर देताना मुख्यमंत्री म्हणाले, "काही लोक आमच्यावर उलटसुलट आरोप करत आहेत. पण हे सहाही खासदार जमिनीवर काम करणारे कार्यकर्ते आहेत. ते जेव्हा तिकडे होते, तेव्हा ते त्यांचे लाडके होते. आता ते आमच्याकडे आले म्हणून त्यांना 'रीलस्टार' बोलले जात आहे. पण हे सगळे खरोखरच 'रिअलस्टार' आहेत. शिवसेना पक्ष आणि धनुष्यबाण वाचवण्यासाठी आम्ही जो लढा सुरू केला होता, हा त्याचाच दुसरा टप्पा आहे. आज हे कट्टर शिवसैनिक बाळासाहेबांच्या आणि आनंद दिघेंच्या खऱ्या शिवसेनेत सामील झाले आहेत."

शिंदेंनी जाहीर केली ६ 'टायगर्स'ची ताकद:

एकनाथ शिंदेंनी प्रवेश केलेल्या सहाही खासदारांचे कौतुक करत त्यांची वैशिष्ट्ये सांगितली:

संजय दिना पाटील: हा दीनांचा कैवारी असून मुंबईत त्यांची मोठी ताकद आहे.

बंडू जाधव: लोकांची आणि मतदारांची नाळ घट्ट जोडलेला हा नेता आहे.

ओमराजे निंबाळकर: हे तर जनतेच्या मनाचे राजे आहेत.

नागेश अष्टीकर: हे आमचे 'ओपनिंग बॅट्समन' आहेत, जे बिनधास्त आहेत. कोणाच्या अध्यात-मध्यात जात नाहीत, पण वाटेला गेल्यास 'नागेश' नाव आहे हे विसरू नका.

भाऊसाहेब वाकचौरे: यांच्या नावातच 'लाडक्या बहिणीचा भाऊ' दडला आहे.

"ओमराजेंनी गेल्या ३-४ दिवसांत आपापल्या मतदारसंघातील कार्यकर्त्यांशी आणि जनतेशी चर्चा केली. मतदारसंघाचा विकास व्हावा आणि जनतेला न्याय मिळावा, याच एकमेव हेतूने हे लोक आले आहेत. हे सर्वजण कोणत्याही स्वार्थासाठी आलेले नसून महाराष्ट्राच्या विकासासाठी एकत्र आले आहेत," असे म्हणत एकनाथ शिंदेंनी या सर्वांचे शिवसेनेत स्वागत केले.