अँटिलिया स्फोटक प्रकरणात मोठी घडामोड! माजी पोलीस अधिकारी सचिन वाझेला जामीन मंजूर
या प्रकरणात तुरुंगात राहिलेल्या काही आरोपींपैकी सचिन वाझे एक होते. मुंबई पोलिसांचे माजी अधिकारी प्रदीप शर्मा, सुनील माने आणि रियाझुद्दीन काझी यांच्यासह या प्रकरणातील बहुतेक आरोपींना आधीच जामीन मंजूर झाला आहे.
विशेष न्यायालयाने १ ऑगस्ट रोजी या प्रकरणात आरोपींविरुद्ध आरोप निश्चित केले होते. आरोपींवर भारतीय दंड संहितेनुसार खून, खंडणी, पुरावा नष्ट करणे आणि गुन्हेगारी कट रचणे यांसारख्या आरोपांखाली खटला चालवला जाईल.
याव्यतिरिक्त, आरोपींवर बेकायदेशीर कृत्ये कायदा आणि स्फोटक पदार्थ कायद्याच्या संबंधित कलमांनुसार आरोप ठेवण्यात आले आहेत. विशेष एनआयए न्यायालयाने आता या प्रकरणात सचिन वाझे यांना जामीन मंजूर केला आहे. जामीन मंजूर करण्याची कारणे आणि त्यासोबत जोडलेल्या अटी सविस्तर आदेश प्रसिद्ध झाल्यानंतर स्पष्ट होतील.
२५ फेब्रुवारी २०२१ रोजी दक्षिण मुंबईतील उद्योगपती मुकेश अंबानी यांच्या निवासस्थानी एंटीलिया जवळ स्फोटके भरून एक SUV कार थांबली होती. एसयूव्हीचे मालक असलेले व्यावसायिक हिरेन हे ५ मार्च २०२१ रोजी मृत आढळले. या प्रकरणात कथित सहभागाबद्दल सचिन वाझे याला मार्च २०२१ मध्ये अटक करण्यात आली.
